Obama asitisha kampeni kumwuguza bibi

Mgombea kiti cha urais wa Marekani kupitia chama cha Democratic, Seneta Barack Obama, ametangaza kuweka kando shughuli za kampeni kwa muda aweze kwenda Hawaii kumwangalia bibi (nyanya) yake ambaye ni mgonjwa.

Tangazo hilo limetolewa na maafisa wake huku Bw Obama akipiga kampeni katika jimbo la Florida, ikiwa ni pamoja na kufanya mkutano bega kwa bega na Hilary Clinton, aliyekuwa hasimu wake katika kura za maoni ndani ya chama cha Democratic.

Kampeni ya Bw Obama imeeleza kuwa kuanzia siku ya Alhamisi mgombea huyo ataacha kampeni ikiendelea na kwenda kumtembelea bibi (nyanya) yake, Madelyn Dunham, mwenye umri wa miaka 85.

Ugonjwa
Maafisa wake wamebainisha kuwa ingawa Bw Obama mwenyewe hatakuwepo lakini kampeni zitaendelea kama kawaida, atawakilishwa na watu wanaomwunga mkono akiwemo mkewe Michelle Obama.

Bw Obama ataahirisha shughuli alizokuwa afanye katika mji wa Des Moines jimbo la Iowa na Madison, kwenye jimbo la Wisconsin.

Hali ya bibi yake Bi Dunham, aliyesaidia kwa kiasi kikubwa kumkuza na kumlea Barack, haifahamiki bayana, ingawa mpambe mmoja Bw Robert Gibbs amesema afya yake imekuwa ikidhoofika katika majuma ya karibuni.

Vijembe
Katika mojawapo yake ya hotuba zake aliahidi kupinga hatua za kuwaondoa watu majumbani mwao kwa sababu wameshindwa kulipa mikopo ya kununua nyumba.

Kwa upande mwingine, mgombea wa chama cha Republican, John McCain amekosoa sera za uchumi za hasimu wake akiapa kupeleka nchi katika mweleko mpya.

Akipiga kampeni huko Missouri, jimbo jingine linalogombewa na vyama vyote, John McCain alimshutumu mpinzani wake wa Democratic kwa kuwapotosha wananchi kuhusu mipango yake ya kuongeza kodi.

Kampeni ya Barack Obama imepata nguvu kutokana na Collin Powell aliyewahi kuwa waziri wa mambo ya nje katika serikali ya rais Bush kutangaza kumwunga mkono na kumtosa mgombea John McCain wa chama chake cha Republican.

Kp Leo

Maalbino Waandamana Dar

Baadhi ya washiriki wakiandamana kupinga mauaji ya Maalbino nchini, yaliyoanzia jana Shule ya Uhuru Mchanganyiko na kupokelewa na Rais Jakaya Kikwete kwenye viwanja vya Karimjee, Dar es Salaam.

Rais Jakaya Kikwete akiteta na Mwenyekiti wa Chama cha Maalbino, Ernest Kimaya, baada ya kupokea maandamano ya kupinga mauaji yao yaliyofanyika jana Dar es Salaam.

Annan aipokea ripoti juu ya ghasia Kenya

Katibu mkuu wa zamani wa Umoja wa Mataifa, Kofi Annan, na ambaye aliongoza shughuli za upatanishi kufuatia mgogoro wa kisiasa nchini Kenya, ameipokea ripoti ya tume iliyochunguza ghasia nchini humu kufuatia uchaguzi wa rais mwaka jana.

Bw Annan aliipongeza tume hiyo iliyosimamiwa na Jaji Waki, akisema ilitekeleza kazi nzuri.

Alisema ataitisha mkutano kati yake na Rais Mwai Kibaki, na Waziri Mkuu Raila Odinga, ili kushauriana juu ya hatua zitakazofaa.

Uchunguzi wa tume hiyo utaendelewa kuhifadhiwa kwa siri, hadi pale hatua muwafaka zitahitajika kuchukuliwa.

Bw Annan alielezea kwamba anafahamu kuna hisia miongoni mwa wengi kutaka kujua ni nani aliyetajwa, au hakutajwa katika uchunguzi wa tume hiyo, lakini alisema ni vyema kuepuka kuwaza hayo, hadi pale kiongozi wa mashtaka, au jaji atakapofungua kesi na kuanza kazi yake.

Alielezea kwamba ni muhimu kufuatia utaratibu unaofaa, hasa katika kuheshimu haki za mtu binafsi, na hii sio mara ya kwanza kuzingatia utaratibu kama huo.

Alisema anaamini ikiwa wote wataheshimu na kuzingatia utaratibu huo, basi utekelezaji utawezekana.

John Meli Aelezea Yaliyomsibu

UNAPOKUTANA na John Meli (55), mara moja utabaini kuwa ni mtu aliyekata tamaa ya kuishi.

Ni kutokana na maisha yanavyomwendea kombo. Ni mlemavu wa mikono yote miwili, ulemavu alioupata ukubwani kiasi cha kumfanya ashindwe kujitegemea kama alivyozoea alipokuwa mtumishi wa Shirika la Reli Tanzania(TRC).

Meli hawezi kukumbuka vizuri hali ilikuwaje hadi akapata ulemavu huo ingawa anajua kuwa mikono yake miwili ilikatwa na mashine.

“Siwezi kusema kwa hakika ni nini kilitokea zaidi ya kuwa nilipostuka, niliona mkono wangu wa kushoto ukiwa tayari umenaswa na mashine na kuvunjika. Nikiwa nimetaharuki nikajikuta natumia mkono wangu wa kulia kuunasua mkono wangu, kumbe ndio nilikuwa najiongezea matatizo makubwa zaidi; mkono wa kulia nao ulikatwa mara moja," anasem Meli.

Alikuwa mfanyakazi wa Shirika la Reli Tanzania (TRC) tangu mwaka 1975 akiwa katika idara ya ufundi. Alitumikia shirika hilo kwa miaka mitano kabla ya kukumbwa na ajali hiyo kubwa iliyomvurugia ndoto ya maisha yake.

"Nilikuwa nikifanya kazi katika karakana ya kituo kikuu cha reli mkoani Tabora," anakumbuka.

"Huko nilikuwa nikichonga vipuri vilivyohitaajika kwa ajili ya mashine za kupandishia mizigo melini kule Mwanza.

"Siku hiyo wafanyakazi wenzangu walikuwa wamekwenda kula chakula cha mchana. Mimi nilitaka kukamilisha kazi zangu kwanza ndipo niende kuungana nao katika chakula.

"Siwezi kukumbuka vizuri ilitokeaje lakini katika kujaribu kumaliza kazi zangu mapema, nilistukia nimeingiza mkono kwenye mashine na baadaye nikaingiza mkono wa pili na kuupoteza mkono wa kulia, huku mwingine ukiwa umeumia vibaya.

"Sasa naishi kwa kutegemea huruma za watu."

Tukio hilo lilitokea Januari 18, 1980 na baada ya kukatika mikono yote, alikimbizwa hospitali ya Mkoa ya Kitete kwa ajili ya kupata matibabu, lakini tayari "nilikua nimeshaharibikiwa kimaisha".

“Maumivu yalipokuwa yakipungua, nililazimika kuanza kufanya mazoezi ya kuandika kwa kutumia mkono wa kushoto ambao ulipona baadaye. Nilipopata kasi katika kuandika nilibadilishiwa kazi na kuwa karani, kazi ambayo niliifanya kwa ufanisi mkubwa,” anasema mfanyakazi huyo wa zamani wa TRC.

"Hata hivyo, kuna wakati anapata maumivu makali kutoka katika mikono yote miwili, hasa mkono naoandikia na hivyo kuendelea kupata mateso.

“Nadhani pia suala hilo liliingiliana na ile hali ya Ustawi wa Jamii wizara kutoa ufadhili wa mimi kupata mkono wa bandia, kwani kulijenga chuki kutoka kwa baadhi ya watu pale ofisini, wengine wakitaka niwape kitu kidogo.

"Nitawezaje kuwasomesha hawa, hasa Jennifer ambaye yuko kidato cha pili na Ezekiel ambaye yuko kidato cha kwanza," anasema.

“Mahali pa kulala sina shida, na fedha za kujikimu sina. Hivi sasa sasa walau Manispaa ya Dodoma imenisaidia kulipa karo ya wanangu. Wakitoka shule wakati mwingine kunakuwa hakuna chakula, na ninavyoona ni kuwa wanangu wanateseka sana,” anasema Meli.

"Angalau tunaweza kupata Sh1,000 kwa siku, hata kama haikishi mahitaji, inasaidia kukabiliana na tatizo la wakati huo," anasema.

“Nimekata tamaa sana. Natamani hata kujitupa katika gari nife, lakini najua itawaoongezea ugumu wa maisha wanangu.Kwa hakika naomba nisaidiwe mtaji wa kufanya biashara ndogondogo.

"Suala la msingi niwe na fedha iwapo mmoja wa wana familia wangu anaumwa asikose matibabu.”

Akiangalia hali yake, Meli anaona kuwa mashirika na makampuni yao wajibu wa kutathmini sera zao kuhusu watu wanaokutwa na matatizo kama yake.

"Ni vyema kuwa karibu na mtu wa aina hiyo ili kumudu kumsaidia kuendeleza maisha," anasema. "Si vizuri kuwapunguza kazini kwa sababu inakuwa kama ni kuwakomoa.

"Mashirika makubwa kama TRC, Tanesco na mengineyo ni vyema yaige mfano Amboni ambayo mmoja wa wafanyakazi wake alipopata ajali na kukatika mkono, alipangiwa kazi ya kufungua mlango getini alipoonekana ameshindwa kuendelea na majukumu yake ya zamani.

Meli, hata hivyo, hakuondoka kavukavu TRC. Alipata kiinua mgongo kilichomfanya anunue nyumba anayoishi hivi sasa.

Alilipwa Sh16 milioni, ikiwa ni mafao yake yote, lakini akalipwa kifuta jasho cha Sh30,000 mwaka 2003 baada ya kupunguzwa kazi mwaka 1981.

Mzee huyo anayeishi katika eneo la Nkuhungu anawaomba wasamaria wema kumsaidia kupata mtaji wa biashara ndogondogo zitakazoendana na ulemavu alionao, akiamini biashara ya duka dogo linaweza kumsaidia kuendesha maisha yake.

Muafaka Wakaribia Kufikiwa Zimbabwe

Rais wa Zimbabwe, Robert Mugabe, na afisa mwandamizi mmoja wa upinzani wamesema muafaka wa kugawana madaraka utafikiwa baada ya muda mfupi.

Gazeti linalomilikiwa na serikali ya nchi hiyo, The Herald limeandika kwamba afisa mmoja wa Bw Mugabe alisema nyadhifa zilizopangwa wiki iliyopita huenda zikabadilishwa.

Hata hivyo, kiongozi wa upinzani Morgan Tsvangirai hakuwa na matumaini makubwa akisema mazungumzo hayo yamekuwa ya ubabaishaji.

Aliyekuwa rais wa Afrika Kusini Thabo Mbeki amekuwa akisimamia mazungumzo hayo kwa siku ya pili sasa.

Bw Mugabe na Bw Tsvangirai walitia saini ya mpango wa kugawana madaraka mwezi uliopita.

Lakini viongozi hao wameshindwa kufikia makubaliano ya kugawana nyadhifa katika wizara mbalimbali nchini humo hadi sasa.

Chanjo ya Kupooza Yaleta Matumaini

Ugonjwa wa kupooza unaweza ukatoweka kabisa nchini Nigeria, moja ya maeneo ya mwisho hapa duniani yanayoendelea yanayokumbwa na maradhi hayo.

Watafiti wanasema sababu ya kutoweka ugonjwa huo ni chanjo yake kuboreshwa zaidi.

Watafiti wa chuo cha Imperial cha London kimegundua chanjo iliyozinduliwa hivi karibuni ina uwezo wa zaidi ya mara nne kuwalinda watoto kuliko chanjo za awali.

Wataalamu hao walisema chanjo hiyo inaweza ikatokomeza kabisa 'type 1 polio' inayojulikana zaidi nchini humo iwapo itawafikiwa watoto wengi.

Nigeria ni moja ya nchi nne tu duniani ambayo bado ugonjwa huo haujatokomezwa.

Asilimia 82 ya kesi za maradhi hayo imeripotiwa kuwepo nchini Nigeria.

Ugonjwa huo una athari kubwa sana na huwadhuru watoto walio chini ya umri wa miaka mitano.

Hivi Polisi Wapokugonga Inakuwaje

Gari la polisi wa usalama Barabarani lenye namba za usajili PT 0310 likiwa limeligonga gari lenye namba za usajili T673 AHK juzi kwenye eneo la uwanja wa Taifa Jijini Dar es Salaam.

Walimu Wagoma Kibaridi

KAMA sheria mpya ya kazi ina mtihani mkubwa wa kwanza tangu ianze kutumika mwaka 2006, basi uamuzi wa jana ndio mtihani mwafaka baada ya walimu katika mikoa mingi nchini, kupuuza amri ya mahakama ya kuzuia mgomo na kutekeleza dhamira yao kwa njia tofauti.

Jumatatu, Jaji William Mandia wa Mahakama ya Kazi alitoa uamuzi wa kuzuia mgomo wa walimu, baada ya kuridhika kuwa mgomo huo ungeathiri sekta nzima ya elimu na hasa wanafunzi ambao wanaendelea na mtihani wa taifa wa kumaliza kidato cha nne. Jaji huyo alitoa amri hiyo baada ya serikali kufungua kesi na kuwasilisha ombi la kuzuia mgomo huo uliopangwa kuanza jana.

"Tumechukizwa sana na kitendo cha serikali kutaka kutuziba midomo kwa kwenda mahakamani. Sasa sisi walimu wa Tarime tunawaomba waje kutufukuza kazi wote," alisema mwenyekiti wa CWT wilayani Tarime, Matinde Magabe.

"Ni aibu kwa serikali kwenda mahakamani eti kuzuia mgomo. Sasa wao waje kufundisha huku vijijini, si wanatudharau sisi."

Naye mwalimu aliyejitambulisha kwa jina la Hassan wa wilayani Tarime alimwambia mwandishi wetu akisema: “Mimi nimekasirika sana kuona serikali inakwenda mahakamani kuweka pingamizi ili tusidai haki yetu. Hivi hawa viongozi kwa kuwa wanaona mambo yao yanawaendea vizuri kutokana na kusomesha watoto wao shule za nje, ndio wanakuwa hawana uchungu na walimu wa Tanzania.”

Walimu hao wanaidai serikali zaidi ya Sh16 bilioni, ikiwa ni sehemu ya Sh23 bilioni ambazo wafanyakazi wanaidai serikali. Limbikizo hilo la fedha za walimu linatokana na fedha za nauli, posho mbalimbali, fedha za uhamisho, huku baadhi ya walimu wakidai kupandishwa madaraja.

Wakati walimu wakianza mgomo huo baridi, chama chao cha taifa jana kilikuwa kikihaha kuwasilisha rufaa yao kwenye Mahakama ya Rufaa kutaka amri hiyo ya Jaji Mandia iondolewe ili waanze mgomo kama ilivyopangwa.

"Tunawasilisha rufaa yetu kesho (leo) na tutasubiri uamuzi iwapo itapita, tutatangaza kuanza mgomo mara moja," alisema mwanasheria wa CWT, Leonard Haule.

"Mgomo wetu ulifuata sheria zote na hivyo ulikuwa halali, lakini mahakama ilizuia kwa muda tu. Walimu lazima waelewe kuwa mgomo haujafutwa, bali umesimamishwa na mahakama. Kwa hiyo rufaa yetu ikishinda, tutaendelea kama ilivyopangwa."

Paulina David kutoka Mwanza anaripoti kuwa, walimu walikuwa wakiimba nyimbo za kutiana nguvu wakati walipokutana kwenye viwanja vya Ghandhi kuanza mgomo.

"Kama sio juhudi zetu walimu... na Kikwete angetoka wapi. Kama siyo juhudi zetu walimu... na majaji wangetoka wapi. Kama siyo juhudi zetu walimu na Maghembe angetoka wapi," ndivyo walivyoimba walimu hao jana.

Walimu hao walikubaliana kuwa wasiende kabisa kazini jana na kwamba leo waende kutia saini tu halafu waondoke bila ya kufanya kazi, lakini Ijumaa wakutane tena kwenye viwanja vya Ghandhi na kujadili mambo yao.

“Tunatoka hapa kwenda nyumbani kulala kesho tunakwenda kusaini kwenye kitabu cha mahudhurio, keshokutwa tunarudi hapa hapa kuendelea na mazungumzo yetu,” alisema mmoja wa walimu

Mwenyekiti wa CWT wa Mwanza, John Kafimbi, alisema kuwa walikataliwa kutumia Ukumbi wa Ghandhi na wamiliki wake waliosema kuwa kutumia ukumbi huo kungemaanisha wamiliki hao kubariki mgomo.

Jijini Dar es salaam, Patricia Kimelemeta anaripoti kuwa walimu walikuwa wakiendesha mgomo baridi baada ya kuripoti kwenye vituo vya vya kazi, lakini wakaamua kutoingia darasani.

Katika baadhi ya shule, walimu hao waliwatangazia wanafunzi wao kuwa hawangeingia madarasani kutokana na sababu zao.

Katika Shule ya Msingi ya Makuburi iliyopo Manispaa ya Kinondoni, walimu hawakuingia madarasani.

“Tumetangaziwa mstarini kuwa walimu hawaingii madarasani kutokana na sababu zao, hivyo basi tumeshindwa kufanya mtihani wa moko na mpaka sasa hatujafundishwa somo lolote na muda wa kuondoka umefika,” alisema mwanafunzi mmoja wa shule hiyo.

Shule nyingine zilizokumbwa na sakata hilo ni Shule ya Msingi Mabibo na Mlimani zilizo Kinondoni wakati kwenye Manispaa ya Ilala ni Shule ya Msingi ya Ulongoni.

Naye Mussa Juma kutoka Tarime anaripoti kuwa zaidi ya walimu 800 walianza mgomo wa kuingia madarasani baada ya uamuzi wa kuridhia mgomo huo kufikiwa jana kwenye Shule ya Msingi ya Turwa.

Walimu hao wanaidai serikali zaidi ya Sh400 milioni.

Akizungumza na Mwananchi baada ya kikao hicho, mwenyekiti wa CWT wilayani Tarime, Matinde Magabe alisema wamekubaliana kuanzia jana kuacha kufundisha.

Mwenyekiti huyo alisema walimu wa wilaya hiyo ya Tarime na wilaya mpya ya Rorya watakuwa wakifika shuleni na kusaini daftari na baadaye kurejea majumbani.

Alisema walimu wa Tarime pekee wanaidai serikali jumla ya Sh236 milioni wakati wa Rorya wakiwa wanadai Sh178 milioni, fedha ambazo ni malimbikizo ya madai mbalimbali.

Mwenyekiti huyo alisema malimbikizo hayo ni pamoja na malipo ya usafiri, likizo, nyongeza za mishahara na malipo mengine ambayo yapo katika mikataba yao ya ajira.

"Pia hapa kuna walimu zaidi ya 500 hawajawahi kupandishwa madaraja hivyo tuna kila sababu ya kuanza mgomo huu," alisema Magabe na kusisitiza kuwa mgomo utaisha pale tu watakapolipwa madai yao yote.

Kutoka Serengeti, Anthony Mayunga anaripoti kuwa walimu katika kata za Issenye, Kisangura, Manchira, Mugumu Mjini, Rung'abure, Machochwe, Ikoma na Kyambahi, waliohojiwa kwa nyakati tofauti, walikiri kuwepo mgomo baridi licha ya serikali kusambaza waraka kuwasihi wasigome.

"Inachofanya serikali ni mchezo wa kuigiza kwa kuwa unaweza kulazimisha punda kwenda mtoni, lakini huwezi kumlazimisha kunywa maji," alisema mwalimu mmoja akimaanisha amri ya Mahakama Kuu kutaka wasigome na uamuzi wao wa kwenda kazini bila ya kufundisha.

Katibu wa CWT wilayani, Wanjala Nyeoja alidai kuwa mgomo baridi unaoendelea ni ishara tosha kuwa walimu wamekata tamaa, wamechoka kuona wanasiasa wananeemeka kwa njia za propogandaa, wakati afisa elimu wilaya, Ishengoma Kyaruzi alidai kuwa alikuwa anafuatilia mashuleni kuona hali halisi ilivyo.

Naye Burhani Yakub wa Tanga anaripoti kuwa walimu wengi kwenye wilaya za mkoa huo walitumia siku ya jana kupiga soga badala ya kuingia darasani, ikiwa ni njia mojawapo ya kugoma.

Wilayani Handeni, Mwananchi imefahamishwa kuwa walimu wa baadhi ya shule zilizopo katika mji wa Chanika walitumia siku ya jana kupiga gumzo wakati wa masomo.

Wakizungumza na Mwananchi kwa sharti la kutotajwa majina yao wala shule wanazofundisha, walimu hao walisema wataendelea na mgomo baridi hadi watakapopata maelekezo mengine kwa kuwa hawana tena ari ya kufanya kazi.

Wilayani Pangani, baadhi ya walimu walisema hawako tayari kufundisha kwa sasa licha ya amri ya mahakama na kwamba wanachotaka ni serikali kuwalipa madai yao badala ya kutafuta njia za kuwatisha kwa kutumia sheria.

Kutoka Sumbawanga, Oscar Simon anaripoti kuwa walimu wilayani Mpanda waliwarejesha majumbani wanafunzi na baadaye walimu kuondoka katika vituo vyao vya kazi, wakiwaacha walimu wakuu pekee.

Mmoja wa walimu ambaye aliomba jina lake lihifadhiwe, alisema kwa njia ya simu kuwa wameanza mgomo huo kama kawaida na kamwe hawataweza kutii agizo la mahakama na viongozi wao la kuacha mgomo

kwani wanaamini kuwa walimu wenyewe ndio wanapaswa kuamka na kudai haki yao.

"Tumefika shuleni kama kawaida, na baadaye tukakubaliana tunaendesha mgomo wetu kama tulivyoazimia. Hivyo tukatawanyika kwenda kuendelea na shughuli nyingine. Hii serikali si ya kucheka nayo... wao ndio vinara wa ufisadi huko juu wanataka kutukandamiza sisi kila siku kwa kutumia mgongo wa mahakama," alisema mwalimu huyo.

Mwl. Juma Kablanketi wa Shule ya Msingi Kashato mjini Mpanda alisema kuwa kimsingi wamekubaliana watakutana kesho kutathimini mgomo wao kama unaendelea au wanarejea kazini kuanzia Jumatatu ijayo.

Kutoka Kibaha, Julieth Ngarabali anaripoti kuwa vikao vya dharura vya viongozi wa CWT wa mkoa wa Pani vilipangwa kufanyika juzi maeneo ya Ruvu, Mlandizi, Kisarawe, Chalinze na Mkuranga na vilikuwa viongozwe na Mwenyekiti Kelvin Mahundi na katibu wake.

Lakini wajumbe waliojitokeza waliwaeleza viongozi hao kuwa hawaelewi kufika kwake kulikuwa na malengo gani na kushangazwa na uamuzi wa Mahakama Kuu, Kitengo cha Kazi, wa kuwataka warejee makazini.

CWT Pwani ilitoa tamko la kuridhia kutoanza mgomo kwa sharti kwamba rufaa ikatwe.

Mwenyekiti Mahumbi alisema pamoja na chama hicho kutoa tamko hilo, hana uhakika kama walimu wote watarejea kazini kwa ari ya kutekeleza majukumu yao kweli ama watakuwa wanazuga tu huko mashuleni.

Uchunguzi wa Mwananchi kwenye shule mbili za sekondari za shirika la elimu Kibaha, shule ya msingi na sekondari ya Nyumbu, Kibaha, Mwendapole, Muungano, Mkoani na Mailimoja, ulionyesha kuwa walimu wengi walikuwa wakiendelea na shughuli zao.

Jijini Dar es salaam, ambako wanachama wa CWT walizua tafrani kubwa wakati viongozi wao walipowataarifu kuwa mgomo umezuiwa, jana walionekana kama wamepungua hasira na shule nyingi zilionekana kuendelea na shughuli za elimu kama kawaida.

Ummy Muya anaripoti kuwa hali ilikuwa shwari katika shule mbalimbali za serikali, zikiwemo Forodhani na Kisutu zilizo katikati ya jiji.

"Hatuwezi kuja maeneo ya kazi na kukaa bila kufanya kazi kwa kuwa kufanya hivyo ni kuwaumiza wanafunzi na sisi mdeni wetu ni serikali kupitia wizara ya elimu," alisema mmoja kwa sharti la kutotajwa jina, lakini akageuka na kusema: "Viongozi wengi wanaisahau sekta ya elimu kwa kuwa watoto wao wanasoma nje ya nchi. Na hata kama wanasoma nchini ni katika shule za kimataifa."

Naye Furaha Kijingo anaripoti kuwa katika Shule ya Msingi Makumbusho na Victoria walimu walikuwa wakiendelea kufundisha kama kawaida.

"Hapa shuleni kwetu hali ni shwari na siwezi kuzungumza lolote kwani maelezo yote yapo kwa mkurugenzi wa manispaa," alisema mwalimu mkuu wa shule hiyo.

Shilowa ana chama kipya Afrika Kusini

Wakati mgawanyiko katika chama hicho ulipojitokeza kwa mara ya kwanza, Mosiuoa Lekota, ambaye alikuwa ni waziri wa ulinzi, aligadhabishwa na viongozi ambao sasa ndio wakuu wa chama cha ANC.

Siku saba baada ya hayo, ameweza kutulia. Kundi hili jipya, ambalo bado halijafahamika, lina nia ya kuonyesha kwamba ni chama cha kisiasa ambacho kitaaminika, sio tu mkusanyiko wa wanasiasa walioshindwa vibaya mno.

Mbhazima Shilowa alijiuzulu kama kiongozi wa eneo tajiri zaidi nchini Afrika Kusini la Gauteng, ikiwa ni hatua ya kupinga kuondolewa mamlakani kwa Thabo Mbeki.

Katika mkutano na waandishi wa habari mjini Johannesburg, alithibitisha kwamba anakihama pia chama cha ANC.

Bw Shilowa sasa atashirikiana na Bw Lekota katika kuandaa mkutano wa kitaifa, tarehe 2 mwezi Novemba, chini ya maudhui ''Katika hali ya Kuitetea Demokrasia Yetu''.

Bw Shilowa alisema chama kipya kitajadili mabadiliko ya katiba, na kutokana na yale yaliyompata yaliyompata Thabi Mbeki akiwa rais wa Afrika Kusini, kuamua kama itafaa rais kuchaguliwa na raia moja kwa moja.

Kufikia sasa, Bw Mbeki hajazungumza lolote kuhusiana na chama kipya kilichoanzishwa na rafiki zake.

Ripoti Yasubiriwa Kenya Juu ya Ukabila

Viongozi wa serikali ya umoja nchini Kenya watapokea ripoti iliyochunguza ghasia za kikabila mapema mwaka huu baada ya matokeo ya uchaguzi kupingwa.

Tume iliyopewa kazi hiyo ilitakiwa kuchunguza namna vyama vya siasa pamoja na vikosi vya usalama vilivyojihusisha katika ghasia hizo.

Mwandishi wa BBC nchini Kenya Peter Greste amesema mgawanyiko uliotokea baada ya uchaguzi wa mwezi Disemba mwaka jana umekuwa wa kikabila na Kenya ilikuwa ikielekea katika vita vya wenyewe kwa wenyewe.

Zaidi ya watu 1,500 waliuawa na wengine wanaofikia 300,000 walilazimika kuzihama nyumba zao.

Baada ya usuluhishi wa kimataifa, Rais Mwai Kibaki na aliyekuwa kiongozi wa upinzani Raila Odinga walitiliana saini makubaliano ya kugawana madaraka mwezi wa Februari na kuunda serikali ya umoja wa kitaifa na Bwana Odinga akawa Waziri Mkuu.

Jaji Philip Waki aliongoza tume ya uchunguzi iliyoteuliwa kufuatia mapendekezo ya jopo la wasuluhishi la Umoja wa Mataifa walioongozwa na Katibu Mkuu wa zamani wa Umoja wa Mataifa Kofi Annan.

Jopo hilo liliwasilisha ripoti yao kwa Bwana Kibaki na Bwana Odinga.

Siku ya Jumanne baraza la mawaziri la Kenya lilisema litatekeleza mapendekezo ya tume nyingine iliyochunguza wizi wa kura uliojitokeza, tume iliyotoa mapendekezo ya kubadilishwa Tume ya uchaguzi.

Msemaji wa aliyekuwa Rais wa Afrika Kusini, amesema Bwana Thabo Mbeki ana matumaini makubwa ya kuokoa mazungumzo yaliyokwama ya kugawana madaraka nchini Zimbabwe.

Msemaji huyo amesema wana hakika watafanikiwa kumaliza suala hilo, bila kujali muda utakaotumika kulitatua.

Mazungumzo ya kugawana madaraka yalikwama baada ya Rais Robert Mugabe mwishoni mwa wiki kuwateua katika wizara nyeti mawaziri kutoka chama chake cha Zanu-PF.

Leo hii Bwana Mbeki alifanya mazungumzo na viongozi wakuu wa Zimbabwe kabla Bunge halijakutana kwa mara ya kwanza tangu wabunge walipoapishwa.

Bunge lenye wabunge wengi kutoka chama cha upinzani cha Movement for Democratic Change (MDC)linatazamiwa kujadiliana suala la kuifanyia marekebisho katiba, ili kumuwezesha kiongozi wa upinzani Bwana Morgan Tsvangirai awe Waziri Mkuu ikiwa ni moja ya masharti muhimu chini ya makubaliano.

Hata hivyo Bwana Tsvangirai ametishia kujiondoa katika mazungumzo hayo baada ya serikali kutangaza wizara muhimu siku ya Jumamosi ikiwemo ziara ya ulinzi, mambo ya ndani, mambo ya nje na sheria kwa chama cha Zanu-PF.

Bwana Tsvangirai anataka nafasi zote za mawaziri zipitiwe upya katika mazungumzo na Bwana Mbeki aliyesimamia mapatano hayo mwezi uliopita, lakini chama cha Zanu-PF kimesema nafasi moja tu ya wizara ya fedha ndio inaweza kujadiliwa.

Makubwa Hayo!!

Mkurugenzi wa Kituo cha Utafiti wa Kilimo Uyole, Dk. Catherine Madata (katikati) akimwonesha Rais Jakaya Kikwete na Mkewe Salma Kikwete mbegu mpya ya mahindi iliyo buniwa na kuzalishwa na kituo hicho wakati Rais lipotembelea kituo hicho juzi.

Piga!! Mpe Jiwe!! Huyooooo!!!....

Rais wa Chama cha Waalimu Tanzania (CWT, Gratias Mukoba akikwepa mawe kutoka kwa waalimu waliojawa na jazba akikimbilia gari la polisi , mkutano wa maandalizi ya mgomo ulivunjika, Makakama Kuu Divisheni ya Kazi ilizuia mgomo wa walimu.

POLISI jana walilazimika kutumia risasi za moto kutawanya walimu waliokuwa wakiwashambulia viongozi wa chama chao, CWT, waliotaka kuwapa taarifa kuwa mgomo wao umezuiwa na Mahakama Kuu, na badala yake wakasema watatekeleza azma yao ya kugoma kuanzia leo.

"Bora tufe kwa risasi tukaepukana na shida tunazoendelea kuzipata kuliko kuendelea kuishi maisha haya," alisema mwalimu mmoja kwenye mkutano huo ulioanza salama kwenye Ukumbi wa Diamond Jubilee, lakini ukavunjika baada ya taarifa hiyo.

"Huu ndio wakati wa kufa tukitafuta haki zetu kwa kuwa tumechoka. Hakuna cha wito tena kwa kuwa hii ni kazi kama nyingine."

"Unajua bwana, hii serikali ina watu wanaotaka kujifanya miungu watu. Sisi tunaanza mgomo kwa aina yoyote ile iwe wa kugoma kuingia darasani au hata kama tutaingia darasani hatutafundisha na kama tukifundisha tutafundisha chini ya kiwango," alisikika mmoja wa walimu hao.

Vurugu, kelele, nyimbo za kulaani, mawe na chupa zilirushwa baada ya rais huyo wa CWT, Gratian Mukoba, kutoa tamko lililoelezea kusitishwa kwa mgomo wa walimu uliokuwa uanze leo nchi nzima kuishinikiza serikali kuwalipa walimu haki zao.

Walimu wanasema kuwa, wanaidai serikali zaidi ya Sh23 bilioni, zikiwa ni malimbikizo ya posho zao mbalimbali, fedha za nauli na pia kudai kupandishwa madaraja na haki nyingine, ambazo serikali imeeleza kuwa zitalipwa na kutekelezwa baada ya kumalizika kwa zoezi la uhakiki wa walimu.

Nyerere Day

Leo hii mwana GATUNDU anaungana na wanajamii wote wa Tanzania kuadhimisha miaka 9 tangu atutoke baba wetu wa taifa Mwl. Julius Kambarage Nyerere.

Lori Laua Watano

WATU watano akiwemo mume na wake zake wawili, wamekufa papo hapo na wengine 10 kujeruhiwa baada ya basi dogo walilokuwa wakisafaria kutoka Sirari kwenda mjini Musoma kugongwa na roli la mafuta, ajali ambayo iliwaunganisha kwa muda wagombea ubunge wa vyama vya CCM na Chadema.

Ajali hiyo ilihusisha magari namba T 808 AHU Toyota Hiace mali ya Elizabeth Pebahati, ambalo lilikuwa na abiria 15 na lori aina ya Mercedes Benz lenye namba za usajili KAZ 821 Z lililokuwa na tela namba ZC 7367 ambalo ni mali ya Kampuni ya Primefuels Liquid Transport ya nchini Kenya.

Watu watano waliokuwa wamekaa kiti cha nyuma, akiwemo mwanamume mmoja na wake zake wawili walifariki wakati wengine 10 wamejeruhiwa. Waliokufa walitambuliwa kuwa ni Gati Manyinyi, 60, aliyekuwa na wake zake wawili Msogoro Gati, 55, na Nyanoko Gati, 40, wakati maiti za watu wengine wawili bado hajizatambuliwa.

Majeruhi waliolazwa katika hospitali ya wilaya ni Marwa Mwita (46), Mwita Ndimi (25),Welema Gati (31) ambaye ni mke wa tatu wa Gati Manyinyi.

Wengine waliojeruhiwa ikiwa ni pamoja na mtu mmoja ambaye hajatambulika jina lake ni Victoria Ogeli (32), Orango Ogeli(51), Moyi Marwa Masero(23), Moris Michael (33) pamoja na Dany Nyamongo (29).

Tukio la kuokoa majeruhi na kutoa maiti kwenye gari hilo lilichukua takriban saa mbili na hivyo liliwapa muda wagombea ubunge wa CCM na Chadema kuungana na wananchi wengine kusaidia zoezi hilo.

Wakati fulani wagombea hao, Christopher Kangoye wa CCM na Charles Mwera wa Chadema, walibeba miili ya watu hao kwa pamoja na kuipandisha kwenye gari.

Jasinta Mwikali, ambaye ni mkazi wa Nairobi nchini Kenya, alisema: “Tulipofika eneo hilo dereva alisimama na kuanza kuzungumza na dereva mwenzake wa Hiace nyingine wakiulizana iwapo mbele kuna trafiki, lakini ghafla tuliona roli hilo likija kwa kasi nyuma yetu.

"Mbele pia kulikuwa na roli jingine likija kasi ndipo dereva alipoondoa gari lakini gari letu liligongwa kwa nyuma."

Walisema ilikuwa ni kazi ngumu kuondoa watu waliokuwa kwenye Hiace kutokana na lori hilo kupanda juu yake na ililazimika kutumia lori jingine la mafuta kuivuta Hiace hiyo ambayo ilitoka ikiwa vipande na maiti moja na maiti nyingine kukandamizwa na tairi la roli hilo.

Dereva wa roli hilo ambaye hajajulikana jina lake amekimbia, wakati dereva wa Hiace hiyo, Mwijuma Abasi pamoja na kondakta wake, Robert Daudi walisalimika na walikuwepo katika eneo hilo la ajali wakisaidia uokoaji.

Happy Birthday JK

Wana-Gatundu wote ulimwenguni wanamtakia kheri ya kuzaliwa Rais wa Jamhuri ya Muungano wa Tanzania Mh. Jakaya Mrisho Kikwete, ambaye alizaliwa tarehe kama ya leo.

Happy Birthday JK

Padri Ataka Prof. Kapuya Ajiuzulu

PADRI wa Kanisa Katoliki Parokia ya Mkokola, Father Winnefrid Dinno amesema Rais Jakaya Kikwete alitumia busara kumtuma Profesa Juma Kapuya kuja Tabora kujionea vifo vya watoto 19 vilivyotokea kwenye jengo la taasisi iliyo chini ya wizara yake, ili waziri huyo ajipime na baadaye kujiwajibisha.

Akihubiri kwenye ibada maalum ya kuwaombea waliofariki, Fr Dinno alisema Prof Kapuya anatakiwa ajiuzulu kwa kuwa anajua kuwa jengo lililoua watoto hao liko chini ya wizara yake na kwamba, alikuwa anajua kuwa kulikuwa na matukio mawili kama hayo kwenye jengo hilo, ingawa hayakuua.

"Alinyamaza kimya mpaka tukio hili limekuwa kubwa kiasi ambacho kimekuwa ni kitendawili kisicho na mteguaji," alisema Fr Dinno alirejea matukio ya mwaka 2006 na 2007 ambayo yalisababisha watoto kadhaa kuzirai baada ya kutokea hitilafu kama hiyo kwenye ukumbi wa Bubbles.

"Waziri wa Russia alijiuzulu kwa vifo tena vya watu wazima, iweje Kapuya asiachie ngazi kutokana na vifo vya watoto 19 ambao ni nguvu kazi ya kesho," alihoji huku akionyesha kutoridhika na juhudi ambazo serikali inadai inazifanya kujua chanzo.

"Kushikilia wahusika hakusaidii kwani bado watu muhimu hawajaachia ngazi. Waachie ngazi kwanza ndio haki itatendeka, vinginevyo tutaletewa ripoti ambayo hata mtu ambaye hajasoma hawezi kukubaliana nayo."

Fr Dinno alisema rais ana busara sana kwa kuwa alijua kwamba mhusika mkuu katika vifo hivyo ni waziri mwenye mamlaka na jengo hilo ndiyo maana alimtuma kumwakilisha kuhudhuria mazishi hayo ili aweze kujipima yeye mwenyewe na kuachia ngazi.

Fr. Dinno alisema mbali na hayo, viongozi hao waliwaambia wafiwa kwamba vifo hivyo ni vya kawaida kwani kuna mtu mmoja mkoani Arusha aliwahi kununua kila kitu, lakini alipokuwa akila mfupa ulimkwama na kupoteza maisha na kwamba ndugu zake hakupewa chochote.

"Kauli za namna hiyo ni za kejeli na hazifai kwa watu ambao wana majonzi mazito kama hayo," alisema Padri huyo.

"Hawa ni viongozi wanaowakilisha watu na watu wenyewe ndio hao wanaowatolea maneno ya kejeli na katika majonzi mazito kama haya.

"Nyie viongozi ni bora mje mtubu kabla ili mtakapojiuzulu jamii iwaone kwamba kejeli mlizozitoa hamkudhamiria mkiwa kama viongozi mliotumwa na rais."

Mazungumzo ya Muungano Yakwama

Mazungumzo kati ya rais Robert Mugabe wa Zimbabwe na waziri mkuu mpya Morgan Tsvangirai yameshindwa kufikia muafaka juu ya baraza la pamoja.

Viongozi hao wawili walitia saini makubaliano ya kugawana madaraka takriban wiki tatu baada ya kufanyika uchaguzi wenye utata nchini humo mwezi Juni.

Katika makubaliano hayo iliamuliwa kuwa Bw Mugabe ambaye amekaa madarakani kwa miongo mitatu atabaki kuwa rais huku Bw Tsvangirai akiwa waziri mkuu.

Pande zote mbili zimekubaliana kukutana mapema wiki ijayo ili kuanza upya mazungumzo.

Msemaji wa chama cha Bw Tsvangirai cha MDC amesema majadiliano hayo yalikuwa ya wazi lakini bado yamekwama.

Msemaji wa Bw Mugabe George Charamba, amesema tofauti zilizokuwepo ni nani apewe uongozi wa uwaziri wa fedha na waziri wa mambo ya ndani.

Chameleon Ajirusha Ghorofani

MSANII maarufu wa Uganda, Jose Chameleon amejirusha kutoka ghorofa ya tatu ya Hoteli ya Impala mjini Arusha na kusababisha kuumia vibaya ikiwa ni pamoja na kuvunjika miguu yote.

Chameleon ambaye amekuwa akitamba na nyimbo za ‘Jamila’, ‘Mama Mia’ na nyingine alijirusha kutoka chumbani kwake katika ghorofa ya tatu ya hoteli hiyo alfajiri ya saa 11 kuamkia juzi.

Imeelezwa msanii huyo alishituka akiwa chini amevunjika miguu hiyo na walinzi walikimbilia eneo aliloangukia baada ya kusikia kishindo na kumkuta akiwa hawezi kuinuka.

Hata hivyo haikueleweka kilichomfanya msanii huyo ajirushe, baadaye wenyeji wake ambao ni Clouds FM waliokuwa wamemualika kwa ajili ya shughuli ya Fiesta ya Tanga juzi walibidi kufanya utaratibu wa kumpeleka hospitali.

Lakini baadaye walitakiwa kutomtibu na baba yake aliagiza ndege ambayo ilitua kwenye Uwanja wa Ndege wa Kimataifa wa KIA na kumbeba na kumpeleka Uganda ambako amelazwa katika hospitali moja ya nchini humo akipata matibabu.

Kuumia kwa msanii huyo kulisababisha ashindwe kufanya shoo katika tamasha la Fiesta ambako kulikuwa na wasanii wengi wa Tanzania na yeye ndiye alikuwa mgeni aliyetakiwa kuongoza shoo hiyo.

Fiesta ya Tanga ilifanyika juzi Jumamosi na wasanii kadhaa walifanya vizuri huku idadi kubwa ya mashabiki wakiwa wamejitokeza katika shoo hiyo ya ufunguzi wa tamasha hilo maarufu zaidi nchini.

 

Mwangura Afikishwa Mahakamani

Afisa wa shirika la kuhudumia mabaharia mashariki mwa Afrika, Bw Andrew Mwangura, amefikishwa mahakamani na kushitakiwa kwa kutoa habari za kutekwa nyara kwa meli ya Ukraine, yenye vifaru 33 vya kivita.

Bw Mwangura ameshitakiwa kwa madai ya kutoa habari zilizokuwa na lengo la kusababisha fujo na uhasama nchini.

Afisa huyo ambae amekuwa akitoa vidokezo kuhusu meli ya Ukraine yenye silaha za kivita pia alishitakiwa kwa kuwa na bangi.

Hata hivyo, Bw Mwangura, ambae alikamatwa jana usiku, anadai maisha yake yamo hatarini.

Pamoja Daima

Mtandao wa simu za mikononi wa Vodacom, hivi majuzi umeanzisha huduma mpya inayoitwa CHIZIKA na Vodacom, ambapo unawapa fursa wateja wake kupiga simu kwanzia saa 12 asubuhi hadi saa 12 jioni kwa shilingi 1500/= tu za kitanzania.

Kujiunga na huduma hii unatakiwa kuhakikisha kuwa una salio la kutosha yaani Tsh 1500/- au zaidi, kisha unapiga namba *147#, baada ya apo utakuwa umejiunga na huduma hiyo ya chizika na vodacom.

Pamoja Daima

MDAU

INTERNET BURE!!!!!!!!!!!!

Mdau Edgar (Mtaalamu wa M-Pesa) akiwa ana zuru blog ya Gatundu na kutuma report yake huku akitumia Mtandao wa Vodacom kupitia kifaa kinachoitwa 3G USB Modem kinachopatikana VodaCom pekee.

Huduma hii Mdau huyu anaipata bure na inapatikana katika ofisi za Vodacom Mlimani City, yaani internet surfing ni bure!!.

Ufaransa Waingilia Suala la EPA

MKATABA wa ukaguzi wa deni la mamilioni ya shilingi katika Akaunti ya Madeni ya Nje (EPA) ndani Benki Kuu ya Tanzania (BoT), umekamilika na Kampuni ya Lazard iliyoteuliwa kufanya ukaguzi huo kuanzia mapema mwezi huu.

Uhakiki huo wa Kampuni ya Lazard ya Ufaransa, uunafanyika wakati BoT imepoteza zaidi ya Sh133 bilioni katika akaunti hiyo zilizotolewa kwa mafisadi katika mazingira ya kutatanisha.

Taarifa kutoka BoT ambazo zilithibitishwa na Gavana wa benki hiyo, Profesa Benno Ndulu, zilisema kuwa mkataba huo uko tayari na Lazard inatarajiwa kuanza kazi wakati wowote kuanzia sasa.

Profesa Ndulu alisema kukamilika kwa mkataba huo kunatokana na mchakato wa muda mrefu uliohusisha BoT na Benki ya Dunia (WB).

"Ndiyo, tumemaliza kukamilisha mkataba, Lazard inatarajiwa kuanza kazi rasmi mwezi huu," alithibitisha gavana Profesa Ndulu.

Profesa Ndulu alifafanua kwamba, katika mkataba huo Lazard pamoja na mambo mengine itaishauri BoT namna bora ya kuachana na usimamizi wa fedha za EPA.

Akiweka bayana, alisema BoT inataka kubaki katika majukumu yake ya kimsingi na kisheria, ambayo ni pamoja na ile ya Benki Kuu ya mwaka 2006.

Kuhusu muda wa ukaguzi huo, Ndulu alisema mkataba unaeleza kwamba Lazard itapaswa kufanya ukaguzi kwa kipindi cha miezi tisa.

"Jambo kubwa pamoja na mengine ni namna ambavyo wananchi yaani BoT itaachana na majukumu ya usimamizi wa fedha za EPA," aliongeza gavana Profesa Ndulu.

Alisema WB ilishiriki katika kuandaa mkataba huo kwani siku za nyuma, iliwahi kushiriki pamoja na kampuni hiyo kuisaidia BoT katika malipo ya fedha za EPA.

Gavana Ndulu aliongeza kwamba, Lazard ni kampuni ambayo awali ilifanyakazi na BoT katika mambo mbalimbali ikiwemo ushauri wa namna bora ya kuimarisha mfumo wa fedha.

Alisema uamuzi wa kuiteua Lazard unatokana na uzoefu wa kampuni hiyo ya Ufaransa, katika utendajikazi wa BoT hasa katika suala la fedha za EPA.

"Hawa Lizard si wageni ndani ya BoT, siku za nyuma waliwahi kufanyakazi nasi na waliweza kutusaidia,"alisisitiza.

Kuanza kwa ukaguzi huo itakuwa ni hatua moja mbele ya kuondoa mzigo wa usimamizi wa fedha za EPA mikononi mwa BoT.

BoT kwa mujibu wa Sheria ya mwaka 2006, inamajukumu mbalimbali ambayo ni pamoja na usimamizi wa shughuli za uchumi wa nchi na sekta ya fedha.

Kusitishwa malipo ya EPA kulifanyika mara baada ya kubainika kwa ufisadi huo baada ya ukaguzi ukufanywa na kampuni ya Ernst$Young na matokeo yake kutangazwa na serikali Januari 9, mwaka huu.

Kwa mujibu wa takwimu za serikali, deni la EPA hadi mwaka 1999 lilifikia dola za Marekani 623 milioni, ambazo kati ya hizo dola 325 milioni zilikuwa ni deni la msingi na dola 298 ni riba na baadaye likaongezeka hadi kufikia dola 677 milioni.

Hata hivyo, kulikuwa na Mpango wa Kununua Madeni (Debt Buy Back Scheme) wa mwaka 1994 kati ya serikali na WB, ambao waliokuwa wakidai BoT waliombwa wakubali kulipwa sehemu tu ya fedha wanazodai.

Katika mpango huo, wapo waliokubali na wengine kukataa na kuongeza kuwa hadi mwaka 2004 taarifa zinaonyesha jumla ya dola 228 zililipwa chini ya mpango huo.

Hata hivyo, utaratibu huo ndiyo ulileta matatizo ambayo yalibainika katika Ukaguzi wa Hesabu za BoT za mwaka 2005/06, ambao ulifanyika Agosti mwaka 2005, ulionyesha matatizo katika ulipaji wa madeni kwa utaratibu wa idhini ya kulipwa wakala wa mdai katika akaunti ya EPA.

Baada ya hapo, kulitokea hali ya kutoelewana kati ya BoT na Mkaguzi Kampuni ya Deloitte & Touche ya Afrika Kusini, aliyegundua tatizo hilo, lakini serikali iliingilia kati na Desemba 4, 2006, ilimuagiza Mdhibiti na Mkaguzi Mkuu wa Hesabu za Serikali (CAG) kuhakikisha ukaguzi huo unafanyika kwa kina ambao ulifanywa na Ernst&Young na kubaini ufisadi wa zaidi ya sh 133 bilioni zililizolipwa kwa makampuni 22.

Kufuatia ufisadi huo, Januri 9 Rais Jakaya Kikwete, alitangazia umma kupitia Katibu Mkuu Kiongozi Philemon Luhanjo, kuhusu kutimuliwa kazi kwa aliyekuwa Gavanawa BoT, marehemu Daud Ballali na kuunda Timu Maalumu chini ya Mwanasheria Mkuu wa Serikali, Johnson Mwanyika, kuchunguza, kukamata na kufungua mashitaka dhidi ya watuhumiwa wa ufisadi huo.

EPA ni akaunti ya madeni ambayo ilitumika wakati wa Mfumo wa Ujamaa, ambayo awali ilikuwa katika iliyokuwa Benki ya Taifa ya Biashara (NBC) chini ya usimamizi wa BoT.

Mwaka 1985, EPA ilihamishiwa moja kwa moja BoT na ndipo mwaka juzi ziliibuliwa tuhuma za ufisadi katika akaunti hiyo

Kp Leo

Moshi Si Mchezo

Mfanyakazi wa Kampuni ya Bonite mjini Moshi akifanya usafi wa kupunguzia nyasi katika bustani iliyopo mzunguko wa Bonite mjini Moshi ambao unahudumiwa na kampuni hiyo alhamisi. Licha ya ukame uliopo katika mji huo lakini bado madhari ya bustani zake inavutia kutokana na kuhudumiwa vyema.

Watoto 19 Wafa Disco

Polisi katikati ya Tanzania imesema takriban watoto 19 wamekufa baada ya kutokea mkanyagano kwenye ukumbi wa Disco wakati wa sikukuu ya Idd.

Tukio hilo la kukanyagana ndani ya ukumbi wa disco limetokea katika mkoa wa Tabora kilometa 750 kaskazini magharibi mwa mji wa Dar es Salaam.

Disco hilo hilo lilikuwa limeandaliwa kama sehemu ya sherehe za Idd al-Fitr kuadhimisha kumalizika mfungo wa mwezi mtukufu wa Ramadhani.

Waliokufa katika mkasa huo ni vijana kati ya umri wa miaka 12 na 17.

Kamanda wa polisi wa mkoa wa Tabora Daudi Siasi, ameliambia Shirika la Utangazaji la Tanzania, kwa mujibu wa uchunguzi wa awali vijana hao 19 walikufa kutokana na kukanyagana na wengine kukosa hewa wakiwa ndani ya ukumbi wa disco.

Kamanda Siasi amesema watu kadha walitibiwa hospitalini kutokana na majeraha waliyopata.

Uchunguzi wa polisi bado unaendelea.